عند الحكومة البوگه

 

 

سجال شعري لشعراء الشعبي المعروفين

 

 

كاظم السماوي

لحد يدور احگوگه....عد الحكومة البوگه

مگرود يبقه ابن الوطن

حسباله حسباته انتهن

يعتقد زردومه اندهن

ما يدري بس هالضوگه......عند الحكومة البوگه

 

حاتم الهاشمي

مگرود ابن الاهوار

وأبن النجف والانبار

بوگ ونهب للستار

والشعب نازل سوگه .....عند الحكومة البوگه

 

كاظم السماوي

نازل السوگ ومنعرف

يا حاتم اترك هلوصف

هسه الالف يلهم الف

والميت الف مسحوگه ....عند الحكومة البوگه

 

كريم كاظم السعداوي

مكرود يا هذا الوطن

بالظيم عايش والمحن

ياهو اليحكمه بهالزمن

يلعب لعب بطروكه ---عد الحكومة البوكه

 

ماجد الحلاوي

نشکي ولا واحد سمع

عیشونه بوهام وبدع

للثوب ما تنفع رگع

کلش چبیره شگوگه... عند الحكومه البوكَه

 

ماجد الحلاوي

إحنه اللي سلمنه الوطن

بيدين حسنه أم اللبن

حگ الفقير إبهل زمن

نامت عليه طابوگه... عند الحكومه البوكَه

 

كاظم السماوي

مسحوگ ظل هذا الشعب

طوبه اصبحوا بعد التعب

البرلماني بي لعب

وشبچه الهدف مشگوگه... عند الحكومه البوكَه

 

اسامة العبيدي

طعنه المنافق والخبل

وهواي رخينه الحبل

ذيل الجلب ما ينعدل

لو بينه خير انسوكه....عد الحكومه البوكه

 

علي الغريب

من يوم سقطنه الصنم

ونجماته شالوهه العلم

لا طفل ..لا شاب السلم

سموم وسرت بعروكَه...عند الحكومة البوكَه

شنسوك اذا هوًّ انجلب

ما شايف وشاف العجب

عدنه حكومه بلا ادب

كل ميت الف خاشوكَه ...عند الحكومة البوكَه

 

علي الغريب

مظلوم من يومه الوطن

مّرنه أشكااال المحن

شكواته بس للهبقن

مسلوبه كل حكَوكَة....عند الحكومة البوكَه

 

 

باسم السماوي

مسكين يا شعب ألذرى

ردوك چنهـــــم للورى

باكَوك وعيـــونك ترى

أمريكا وي هل جوكَه .. عند ألحكومه ألبوكَه

 

علي الغريب

مرينه بيكم يا حـــــمد

مامش بعد شي أنحصد؟

كل ظنتي الظلم انوئد!

لابد طريقة نعوكَة ... عند الحكومه البوكَه

 

 

احمد الصالحي

يا كاظم او زاد البخل

والخل بعد ما ضلّه خل

حتى النهر عاف النخل

من كَطعوها اعثوكَه .. عند الحكومه البوكَه

 

 

حاتم الهاشمي

بيدين حسنه أم اللبن

احلامنه كلهه انتهن

صارت الغيرة ابلا ثمن

ويه اللبن مطروگه.....عند الحكومة البوگه

 

 

علي الغريب

غاب الضمير وما رجع

والشعب مل من الوجع

لغير الله صدك ما ركع

وحدوده ما مغلوكَه ...عند الحكومه البو كَه

 

 

احمد الصالحي

هاي الحكومه امخالفه

ما ظن بعد بيهه وفه

امبينه القضيّه امزيّفه

وبالكَصه هالمدكَوكَه .... عند الحكومه البوكَه

 

علي الغريب

شيجب عدلك يا علي

شوف الوطن هالمبتلي

أرضي وصفت ما هي الي

ولا بيها الي طابوكَه ..... عند الحكومة البوكَه

 

 

حمودي الحياوي

الدسـتـور گِـلي شـوصه

گـطعــو علينه الحصـــه

والشـكــر بـاگــو نصــه

خلــونه بس انضوكَـــه .. عند الحكومة البوگــه

 

 

علي الغريب

رغم الجرى يا هالوطن

واهوالك الراحن وآجن

تبقى عراق النه حظن

عاشكَ وفي المعشوكَه .... عند الحكومة البوكَه

 

 

حاتم الهاشمي

محروم كلش الشعب

نفط العرب مو للعرب

نركض ومامش بس تعب

واعصابنه محروگه.....عند الحكومة البوگه

 

 

علي الغريب

عين الوطن لتظن غفت

دم مو دمع هيه بجت

عالوالده المــــا قط شكت

شمعه وصفت محروكَه ....عند الحكومه البوكَه

 

 

احمد الصالحي

لا بعده ما فز الوطن

ولا شعبه للصاير فطن

من اذنك اشلع هالكَطن

دكَ الطبل داكَوكَه .. عند الحكومه البوكَه

 

اسامه العبيدي

معروف شعبي بعادته

مو اي بطن هالشالته

جانت الدنيه بعازته

كلهه ونطه من احكَوكَه ... عند الحكومه البوكَه

يا برلماني اسمع ولك

كبلَك على الكرسي هلك

ربك ابلحظه ايبدلك

يا جهرة العكَروكَه .. عند الحكومه البوكَه

 

 

كاظم جابر السماوي

ريسهم ايحك كفشته

وبليس نافخ كرشته

بستوگه ظمهه اعله الشته

وينشد على البستوگه ..عند الحكومه البوگه

 

 

مصطفى سينو

يعراق من يومك جرح

والحال شيعدله ويصح

الليل بيك بلا صبح

... عاشك بلا معشوكه...عند الحكومه البوكَه

 

باسم السماوي

لــو زين شفتـــه وتنتخب

بـس قاعة ألمجلس يطب

يتعلـــم ألبــوكَ وچـــذب

ألكَبله أعله ذني يسوكَه... عنــد ألحكومه البوكه

 

جلال البطاط

الشعب خدعو ونتخب

وضاعت السلة والعنب

مكرود يا هذا الشعب

اصوات العدل مخنوَكة....عند الحكومة البوكة

 

محمد النصراوي

دلوني يا أهل الشرف

شنهو اللي باقي منلغف

عيشوا شعبنا بالشظف

حصروه بنص بستوكه ... عند الحكومة البوكه

 

جلال البطاط

يا ناس ملينة الصبر

وجرح الوطن ما ينجبر

الجرة بتونس لو مصر

كل طاغي راح يضوكه....عند الحكومة البوكه

 

 

 

تنويه / صوت اليسار العراقي لا يتحمل بالضرورة مسؤوليّة جميع المواد المنشورة .. ويتحمل الكُتّاب كامل المسؤولية القانونية والأخلاقية عن كتاباتهم

الصفحة الرئيسية | [2]  [3] [4] | أرشيف المقالات | دراسات | عمال ونقابات | فنون وآداب | كاريكاتير  | المرأة | الأطفال | حضارة بلاد الرافدين | إتصل بنا